William Marrion Branham
                                       
                  Opinberunarbókin 3:14-22: 
"Og engli safnaðarins í Laódíkeu skalt þú rita: Þetta segir hann, sem er amen, votturinn trúi og sanni, upphaf sköpunar Guðs: Ég þekki verkin þín, að þú ert hvorki kaldur né heitur. Betur að þú værir kaldur eða heitur. En af því að þú ert hálfvolgur og hvorki heitur né kaldur, mun ég skyrpa þér út úr munni mínum. Þú segir: Ég er ríkur og orðinn auðugur og þarfnast einskis. Og þú veist ekki að þú ert vesalingur og aumingi og  fátækur og blindur og nakinn. Ég ræð þér, að þú kaupir af mér gull, skírt í eldi, til þess að þú verðir auðugur og hvít klæði til að skýla þér með, að eigi komi í ljós vanvirða nektar þinnar, og smyrsl til að smyrja með augu þín, til þess að þú verðir sjáandi. Alla þá, sem ég elska, tyfta ég og aga. Ver því heilhuga og ger iðrun. Sjá, ég stend við dyrnar og kný á. Ef einhver heyrir raust mína og lýkur upp dyrunum, þá mun ég fara inn til hans og neyta kvöldverðar með honum og hann með mér. Þann er sigrar mun ég láta sitja hjá mér í hásæti mínu, eins og ég sjálfur sigraði og settist hjá föður mínum í hásæti hans. Hver sem eyra hefur, hann heyri hvað andinn segir söfnuðunum."

Sendiboðinn 
Eftir William Marrion Branham

   Ég efast um að nokkur öld (Ákveðið tímaskeið, ekki endilega hundrað ár.) hafi í sannleika þekkt þann sendiboða, sem Guð hafði sent til hennar, nema fyrsta öldin, þegar Páll var sendiboðinn. Og jafnvel á þeirri öld voru margir, sem ekki báru kennsl á hann, að hann var sá sem hann var. 

   Öldin, sem við lifum á, mun verða mjög stutt. Atburðirnir munu gerast mjög hratt. Sendiboðinn til Laódíkeualdarinnar hlýtur því að vera hér núna. Það getur samt verið að við þekkjum hann ekki enn. Það hlýtur samt að koma að því að hann verði þekktur. Ég get sannað það, af því að við höfum ritningagrein, sem lýsir þjónustu hans.

    Í fyrsta lagi: Þessi sendiboði mun vera spámaður. Hann mun hafa spámannlega þjónustu. Hún mun vera staðfastlega byggð á Orðinu, af því að þegar hann spáir eða sér sýnir mun það alltaf verða byggt á orðinu, og það mun ALLTAF verða svo sem hann segir. Hann mun verða sannaður sem spámaður vegna nákæmni sinnar. Sönnun þess er að finna í Opinberunarbókinni 10:7: "En þegar kemur að rödd sjöunda engilsins og hann fer að básúna, mun fram koma leyndardómur Guðs, eins og hann hafði boðað þjónum sínum, spámönnunum." Þessi persóna, sem hér kallast "engill", er ekki himnesk vera. Sjötta engilinn sem básúnar, og er himnesk vera, er að finna í Opinberunarbókinni 9:13, og hinn sjöundi af líkum uppruna er í Opinberunarbókinni 11:15. Þessi hér, í Opinberunarbókinni 10:7, er sendiboðinn til sjöundu aldarinnar, og hann er maður. Hann á að flytja skilaboð frá Guði og í þjónustu hans mun fram koma leyndardómur Guðs, eins og hann hafði boðað þjónum sínum, spámönnunum. Guð mun koma fram við þennan sendiboða sem spámann, AF ÞVÍ AÐ HANN ER SPÁMAÐUR. Páll var slíkur á fyrstu öldinni, og síðasta öldin á líka spámann. Amos 3:6-7: "Verður lúðurinn svo þeyttur innan borgar, að fólkið flykkist ekki saman í angist? Vill nokkur ógæfa svo til í borginni, að Drottinn sé ekki valdur að henni. Nei, Drottinn Guð gerir ekkert án þess að hann hafi opinberað þjónum sínum, spámönnunum, ráðsályktun sína." Það var á endatímatimabili að hinar sjö þrumur Jesú þrumuðu. Opinberunarbókin 10:3-4: "Hann kallaði hárri röddu, eins og þegar ljón öskrar. Er hann hafði kallað, töluðu þrumurnar sjö sínum raustum. Og er þrumurnar sjö höfðu talað, ætlaði ég að fara að rita. Þá heyrði ég rödd af himni, sem sagði: 'Innsigla þú það, sem þrumurnar sjö töluðu, og rita það ekki.'"

    Enginn veit hvað þrumurnar sögðu. En við þurfum að vita það. Við þörfnumst spámanns, til að fá opinberunina, af því að Guð hefur enga aðra leið til að koma til okkar opinberun Ritningarinnar en í gegnum spámann. Orðið kom alltaf til spámanns, og mun alltaf gera það. Að þetta sé lögmál Guðs sjáum við jafnvel á snöggri yfirferð gegnum Ritninguna. Hinn óumbreytanlegi Guð, hvers vegir eru óumbreytanlegir, sendi alltaf spámann á hverri öld, þegar fólkið hafði fjarlægst lögmál Guðs. Þegar bæði guðfræðingarnir og lýðurinn höfðu yfirgefið Orðið, sendi Guð alltaf þjón sinn til þess fólks (en hann var aðskilinn frá guðfræðingunum) til að leiðrétta villukenningar og leiða fólkið aftur til Guðs. Við sjáum því að sendiboði sjöundu aldarinnar mun koma, og hann er spámaður. Við sjáum þennan sendiboða ekki bara í Opinberunarbókinni 10:7. Við komumst að því, að Orðið talar um að Elía komi áður en Jesús snýr aftur. Í Matteusi 17:10: " Lærisveinarnir spurðu hann: "Hví segja fræðimennirnir að Elía eigi fyrst að koma?" Hann svaraði: "Víst kemur Elía og færir allt í lag."" Áður en Drottinn kemur, verður Elía að koma og lagfæra kirkjuna. Þetta er það sem Malakí 4:5 segir: "Sjá, ég sendi yður Elía spámann, áður en hinn mikli og ógurlegi dagur Drottins kemur. Hann mun sætta feður við sonu og sonu við feður, til þess að ég komi ekki og ljósti landið banni." Það er enginn efi á því, að Elía verður að snúa aftur, áður en endurkoma Jesú á sér stað. Hann hefur alveg sérstakt verk að vinna. Það verk er sá hluti af Malakí 4:6, sem segir að hann sætti sonu við feður. 
 
  Þjónusta Jóhannesar skírara var samkvæmt Lúkasi 1:17: "Og hann mun ganga fyrir honum í anda og krafti Elía til að snúa hjörtum feðra til barna og óhlýðnum til hugarfars réttlátra og búa Drottni altygjaðan lýð." Í þjónustu Jóhannesar var hjörtum feðra snúið til barna. Við vitum að Jesús sagði það. En það stendur ekki að hjörtum barna hafi verið snúið til feðra. Það á ennþá eftir að eiga sér stað. Hjörtum barnanna á síðustu tímum verður snúið aftur til hvítasunnufeðranna. Jóhannes gerði feðurna reiðubúna, til að Jesú gæti boðið þá velkomna. Þessi spámaður, sem andi Elía verður yfir, mun gera börnin reiðubúin til að bjóða Jesú velkominn. Jesús talaði um Jóhannes skírara í Matteusi 17:12: "En ég segi yður: Elía er þegar kominn, og menn þekktu hann ekki, heldur gjörðu honum allt sem þeir vildu."

 Ástæða þess að hann kallaði Jóhannes Elía, er sú, að sami andi og var yfir Elía, hafði komið yfir Jóhannes, alveg eins og sá andi kom yfir Elísa eftir ríki Akabs. Þessi sami andi mun koma yfir annan mann rétt áður en Jesús kemur aftur. Hann mun vera spámaður. Hann verður sannaður sem slíkur af Guði. Þar sem Jesús verður hér ekki í holdi, til að sanna hann, þá verður það gert af Heilögum Anda, þannig að þjónustu spámannsins munu fylgja margar undursamlegar birtingar. Sem spámanns, mun sérhver opinberun hans verða staðfest, því að opinberun mun eiga sér stað. Dýrðleg kraftaverk munu gerast fyrir tilskipanir hans, talaðar í trú. Síðan munu skilaboðin koma fram, sem Guð hefur gefið honum í Orðinu, að snúa fólki aftur til Orðsins og kraftar Guðs. Sumir munu hlusta, en meirihlutinn mun vera samkvæmur sjálfum sér og hafna honum. Þar sem þessi sendiboði Opinberunarbókarinnar 10:7 verður sá sami og í Malakí 4:5-6, þá mun hann eðlilega líkjast bæði Elía og Jóhannesi. Báðir þessir menn voru aðskildir frá hinum trúarlegu skólum síns dags. Báðir voru menn óbyggðanna. Báðir unnu aðeins þegar þeir höfðu: "Svo segir Drottinn", beint frá Guði fyrir opinberun. Báðir börðust gegn trúarhreyfingum og leiðtogum dagsins. En ekki bara það, þeir fóru líka gegn öllum þeim, sem voru siðspilltir og reyndu að spilla öðrum. Og takið eftir að báðir spáðu mikið gegn ósiðsömum konum og vegum þeirra. Elía hrópaði gegn Jesebel og Jóhannes skammaði Herodías, konu Filippusar. Þótt hann verði ekki vinsæll, þá verður hann sannaður af Guði. Eins og Jesús staðfesti Jóhannes og Heilagur Andi staðfesti Jesú, getum við búist við að þessi maður verði staðfestur fyrir það að Andinn vinni kraftaverk gegnum hann með einstökum hætti. Og þegar Jesús snýr aftur mun Hann viðurkenna hann, eins og hann viðurkenndi Jóhannes. Jóhannes vitnaði um að Jesús væri að koma, eins mun þessi maður vitna eins og Jóhannes um að Jesús sé að koma og endurkoma Krists mun sanna að þessi maður var sannarlega fyrirrennari seinni komu hans. Þetta verður lokasönnun þess að þetta sé sannarlega spámaður Malakí 4:5-6, af því að endir tímabils heiðingjanna, verður sá, að Jesús sjálfur birtist. Þá verður allt um seinan fyrir þá sem höfnuðu honum. 
 
  Til að útskýra betur kynningu okkar á þessum spámanni síðustu tíma, þá skulum við taka sérstaklega eftir því að spámaðurinn í Matteusi 11:12, var Jóhannes skírari, sem var sá sem talað var um í Malakí 3:1: "Sjá, ég sendi sendiboða minn, og hann mun greiða veginn fyrir mér. Og bráðlega mun hann koma til musteris sins, sá Drottinn er þér leitið, og engill sáttmálans, sá er þér þráið. Sjá, hann kemur segir Drottinn allsherjar." Matteus 11:1-12: "Þá er Jesús hafði mælt svo fyrir við lærisveina sína tólf, hélt hann þaðan að kenna og prédika í borgum þeirra. Jóhannes heyrði í fangelsinu um verk Krists. Þá sendi hann honum orð með lærisveinum sínum og spurði: "Ert þú sá, sem koma skal, eða eigum vér að vænta annars?" Jesús svaraði þeim: "Farið og kunngjörið Jóhannesi það, sem þér heyrið og sjáið. Blindir fá sýn og haltir ganga, líkþráir hreinsast og daufir heyra, dauðir rísa upp, og fátækum er boðað fagnaðarerindi. Og sæll er sá, sem hneykslast ekki á mér." Þegar þeir voru farnir, tók Jesús að tala til mannfjöldans um Jóhannes: "Hvað fóruð þér að sjá í óbyggðum? Reyr af vindi skekinn? Hvað fóruð þér að sjá? Prúðbúinn mann? Nei, prúðbúna menn er að finna í sölum konunga. Til hvers fóruð þér? Að sjá spámann? Já, segi ég yður, og það meira en spámann. Hann er sá, sem um er ritað: "Sjá, ég sendi sendiboða minn á undan þér, er greiða mun veg þinn fyrir þér." Sannlega segi ég yður: Enginn er sá af konu fæddur, sem meiri sé en Jóhannes skírari. En hinn minnsti í himnaríki er honum meiri." Þetta hefur þegar gerst. Það er búið að eiga sér stað. En takið nú eftir í Malakí 4:1-6: "Því sjá, dagurinn kemur, brennandi sem ofn, og allir hrokafullir og allir þeir er guðleysi fremja, munu þá vera sem hálmleggir, og dagurinn sem kemur, mun kveikja í þeim segir Drottinn allsherjar svo að hvorki verði eftir af þeim rót né kvistur. En yfir yður, sem óttist nafn mitt, mun réttlætissólin upp renna, með græðslu undir vængjum sínum, og þér munuð út koma og leika yður eins og kálfar, sem út er hleypt úr stíu, og þér munuð sundur troða hina óguðlegu, því að þeir munu verða aska undir iljum yðar á þeim degi er ég hefst handa segir Drottinn allsherjar. Munið eftir lögmáli Móse þjóns míns, þess er ég á Hóreb fól setninga og ákvæði fyrir allan Ísrael. Sjá, ég sendi yður Elía spámann, áður en hinn mikli og ógurlegi dagur Drottins kemur. Hann mun sætta feður við sonu og sonu við feður, til þess að ég komi ekki og ljósti landið banni." Sjáið þið til, strax eftir komu þessa Elía, mun jörðin hreinsast með eldi og hinir óguðlegu verða að ösku. Þetta gerðist auðvitað ekki á dögum Jóhannesar (Elía síns tíma.) Andi Guðs, sem spáði um komu sendiboðans í Malakí 3:1 (Jóhannesar) var aðeins að ítreka hina spámannlegu yfirlýsingu Jesaja 40:3: "Heyr, kallað er: "Greiðið götu Drottins í eyðimörkinni, ryðjið Guði vorum veg í óbyggðinni."" Jóhannes var fyrir Heilagan Anda, bæði rödd Jesaja og Malakí, í Matteusi 3:3: "Jóhannes er sá sem svo er um mælt hjá Jesaja spámanni: Rödd hrópanda í eyðimörk: Greiðið veg Drottins, gjörið beinar brautir hans."

   Við sjáum því út frá Ritningunni að spámaðurinn í 3. kafla Malakí, sem var Jóhannes, var ekki spámaður 4. kafla Malakí, þótt að Jóhannes og þessi spámaður síðustu tíma hefðu yfir sér sama anda og var yfir Elía. Þessi sendiboði í 4. kafla Malakí og 10. kafla Opinberunarbókarinnar, mun gera tvennt. Í fyrsta lagi mun hann, samkvæmt 4. kafla Malakí snúa hjörtum barna til feðra. Í öðru lagi mun hann opinbera leyndardóm þrumanna sjö í tíunda kafla Opinberunarbókarinnar, sem er leyndardómurinn, sem er innifalinn í innsiglunum sjö. Það verður þessi Guðlega opinberaði leyndardómssannleikur, sem bókstaflega snýr hjörtum barna til feðra. Nákvæmlega á þann hátt.

   En íhugið einnig þetta. Þessi spámannlegi sendiboði mun líkjast Elía og Jóhannesi í eðli sínu og hegðun. Fólkið á hans dögum verður líkt fólkinu á tímum Akabs og Jóhannesar. Og þar sem aðeins hjörtum barnanna verður snúið, þá eru það aðeins börnin sem munu hlusta. Á dögum Akabs fundust aðeins sjö þúsund sannir ísraelsmenn. Á dögum Jóhannesar voru þeir aðeins örfáir. Fjöldinn var fastur í viðurstyggð skurðgoðadýrkunar á báðum þessum öldum.

   Ég vil bera saman á einn veg í viðbót, hinn spámannlega sendiboða Laódíkeualdarinnar og Jóhannes, spámannlega sendiboðann, sem var fyrirrennari fyrri komu Jesú Krists. Fólkið á tímum Jóhannesar hélt að hann væri Messías. Jóhannes 1:19-20: "Þessi er vitnisburður Jóhannesar, þegar gyðingar sendu til hans presta og levíta frá Jerúsalem að spyrja hann: "Hver ert þú?" Hann svaraði ótvírætt og játaði: "Ekki er ég Kristur." Þessi sendiboði síðustu tíma mun hafa slíkt vald frammi fyrir Drottni að sumir munu halda að hann sé Drottinn Jesús. (Það verður andi í heiminum á endatímunum, sem fær þá til að trúa þessu. Matteus 24:23-26: "Því að fram munu koma falskristar og falsspámenn, og þeir munu gjöra stór tákn og undur til að leiða afvega jafnvel hina útvöldu, ef orðið gæti. Sjá, ég hefi sagt yður það fyrir. Ef þeir segja við yður: "Sjá, hann er í óbyggðum, þá farið ekki þangað. Ef þeir segja: "Sjá, hann er í leynum, þá trúið því ekki.") En ekki trúa því. Hann er ekki Jesús Kristur. Hann er ekki sonur Guðs. HANN ER EINN AF BRÆÐRUNUM, SPÁMAÐUR, SENDIBOÐI, ÞJÓNN GUÐS. Hann þarfnast ekki meiri heiðurs en Jóhannes fékk, er hann var röddin sem hrópaði: "Ég er ekki hann, EN HANN KEMUR Á EFTIR MÉR." 

  Áður en við ljúkum þessum hluta um sendiboða Laódíkeualdarinnar, verðum við að ígrunda tvennt vandlega. Í fyrsta lagi, þessi öld mun fá EINN spámannlegan sendiboða. Opinberunarbókin 10:7 segir: "Og hann (eintala) fer að básúna." Það hefur aldrei gerst á neinni öld, að Guð hafi gefið tvo stóra spámenn á sama tíma. Hann gaf Enok (einan) Hann gaf Nóa (einan). Hann gaf Móse. (Hann einn hafði orðið, þótt að aðrir spáðu.) Jóhannes skírari kom einn. Á þessum síðustu tímum mun koma SPÁMAÐUR. (Ekki spákona, þótt að á þessari öld þykist fleiri konur hafa orð Guðs en karlmenn.) Og orðið, sem ekki verður fellt úr gildi, segir að hann, spámaðurinn, muni opinbera lýð síðustu tíma leyndardómana, og snúa hjörtum barnanna til feðranna.

   Þeir eru til, sem segja að lýður Guðs muni sameinast gegnum sameiginlega opinberun. Ég mótmæli þessari staðhæfingu í ljósi tíunda kafla Opinberunarbókarinnar. Ég neita því ekki að fólk muni spá á þessari síðustu öld og þjónusta þeirra getur og mun vera rétt. Ég neita ekki að það muni verða til spámenn eins og á dögum Páls, þegar Agabus spáði hungursneyð. Ég viðurkenni að þetta sé svo. EN ÉG NEITA ÞVÍ MEÐ SÖNNUN HINS ÓBRIGÐULA ORÐS AÐ ÞAÐ SÉ FLEIRI EN EINN STÓR SPÁMANNLEGUR SENDIBOÐI, SEM OPINBERI LEYNDARDÓMANA, SEM INNIFALDIR ERU Í ORÐINU OG HEFUR ÞÁ ÞJÓNUSTU AÐ SNÚA HJARTA BARNA TIL FEÐRA. "Svo segir Drottinn" í sínu óbrigðula orði. Það stendur fast og mun standa og sanna sig.   Það er einn sendiboði til þessarar aldar. Við vitum og byggjum það á þekkingu á mannlegri hegðun, að þar sem margir koma saman, verða mismunandi skoðanir á minniháttar þáttum kenninga, sem hver og einn heldur sér við. Hver mun þá hafa það Orð, sem gefið verður þessari öld, og ekki mun bregðast, af því að á þessari öld mun hin sanna brúður Orðsins koma fram. Það þýðir að Orðið verður aftur eins og það var gefið í fullkomnun, og gjörskilið á dögum Páls. Ég skal segja ykkur hver mun hafa það. Það verður spámaður, sem Guð mun staðfesta jafnmikið og jafnvel betur en nokkurn annan, allt frá Enok og til þessa dags, af því að þjónusta hans mun hafa toppstein spámannlegrar þjónustu og Guð mun sýna sig máttugan. Hann mun ekki þurfa að tala fyrir sjálfan sig. Guð mun tala fyrir hann gegnum rödd tákna. Amen.

   Annað, sem við verðum að muna, er að við upphaf kirkjualdanna kom andkristsandinn fram, sem og Heilagur Andi, Hann, sem er blessaður um aldir. 1. Jóhannesarbréf 4:1: "Þér elskaðir, trúið ekki sérhverjum anda, heldur reynið andana, hvort þeir séu frá Guði. Því margir falsspámenn eru farnir út í heiminn." Tókuð þið eftir þessu? Andkristsandinn er tengdur falsspámönnum. Í upphafi kirkjualdanna komu fram falsspámenn og við endi hennar munu koma fram falsspámenn. Auðvitað mun koma fram RAUNVERULEGUR FALSSPÁMAÐUR í þeim skilningi sem talað er um í Opinberunarbókinni. En áður en hann opinberast munu margir falsspámenn koma fram. Matteus 24:23-26: " Ef einhver segir þá við yður: "Hér er Kristur, eða þar." þá trúið því ekki. Því að fram munu koma falskristar og falsspámenn, og þeir munu gera stór tákn og undur til að leiða afvega jafnvel hina útvöldu, ef orðið gæti. Sjá, ég hef sagt yður það fyrir. Ef þeir segja við yður: "Sjá, hann er í óbyggðum," þá farið ekki þangað. Ef þeir segja: "Sjá, hann er í leynum," þá trúið því ekki." Þessum falsspámönnum er lýst fyrir okkur í ýmsum ritningastöðum, t.d. í eftirfarandi versum: 2. Pétursbréf 2:1-2: "En falsspámenn komu einnig upp meðal lýðsins. Eins munu falskennendur líka verða á meðal yðar, er smeygja munu inn háskalegum villukenningum og jafnvel afneita herra sínum, sem keypti þá, og leiða yfir sig sjálfa bráða glötun. Margir munu fylgja ólifnaði þeirra og sakir þeirra mun vegi sannleikans verða hallmælt." 2. Tímóteusarbréf 4:3-4: "Því að þann tíma mun að bera, er menn þola ekki hina heilnæmu kenning, heldur hópa þeir að sér kennurum eftir eigin fýsnum sínum til þess að heyra það, sem kitlar eyrun. Þeir munu snúa eyrum sínum burt frá sannleikanum og hverfa að ævintýrum." 1. Tímóteusarbréf 4:1: "Andinn segir berlega, að á síðari tímum muni sumir ganga af trúnni og gefa sig að villuöndum og lærdómum illra anda." Þú munt sjá það, að í öllum tilvikum er falsspámaðurinn fyrir utan Orðið. Eins og við höfum sýnt fram á að "andkristur" þýði "gegn orðinu," eins munu þessir falsspámenn rangsnúa Orðinu og gefa því merkingu, sem passar við þeirra djöfullegu áætlanir. Hefur þú tekið eftir því, að fólk sem leiðir aðra afvega, bindur það við sig með ótta? Þeir segja, að ef fólk geri ekki það sem það segi, eða yfirgefi þá, þá muni eyðilegging koma yfir það. Þeir eru falsspámenn, af því að sannur spámaður leiðir alltaf til Orðsins og bindur fólkið við Drottin Jesú Krist og hann mun ekki segja fólkinu að óttast sig, heldur það sem standi í Orðinu. Takið eftir að þetta fólk sækist eftir peningum, alveg eins og Júdas. Það fær þig til að selja allar eigur þínar og gefa þær sér og sínum áætlunum. Þeir sem hafa gjafir, munu nota gjöf, sem hefur villu í sér og biðja síðan um peninga og hunsa Orð Guðs og segja að þetta sé frá Guði. Og fólkið mun fylgja þeim og umbera þá og styðja og trúa þeim, án þess að vita að það sé verið að leiða það á helslóðir. 

   Já, landið er fullt af eftirhermum. Á síðustu tímum mun verða reynt að herma eftir þessum spámannlega sendiboða. Hinir sjö synir Skeva, reyndu að herma eftir Páli. Símon töframaður reyndi að herma eftir Pétri. Eftirhermur þeirra munu vera holdlegar. Þeir munu ekki geta gert sömu verk og hinn sanni spámaður. Þegar hann lýsir því yfir að vakningunni sé lokið, munu þeir fara um og segjast hafa mikla opinberun um að það sem fólkið hafi sé alveg rétt og að Guð muni gera undursamlega hluti meðal lýðs síns. Og fólkið mun falla fyrir þessu. Þessir sömu falsspámenn munu halda því fram að sendiboði síðustu tíma sé ekki guðfræðingur og þess vegna ættu menn ekki að hlýða á hann. Þeir munu ekki geta gert þau verk sem þessi sendiboði gerir. Þeir munu ekki verða sannaðir af Guði, eins og þessi sendiboði verður, en þeir munu vara fólkið við að trúa því sem hann segir og segja að kenningar hans séu rangar. Þeir eru sannir synir feðra sinna, faríseanna, sem voru af djöflinum, af því að þeir héldu því fram að það sem Jóhannes og Jesús kenndu væri rangt. Af hverju snúast þessir falsspámenn gegn hinum sanna spámanni og reyna að gera kenningar hans ótrúverðugar? Af því að þeir eru samkvæmir sjálfum sér, eins og feður þeirra, sem stóðu gegn Míka spámanni á tímum Akabs. Þeir voru fjögur hundruð og voru allir sammála. Þeir sögðu allir það sama og blekktu fólkið. En einn spámaður, AÐEINS EINN, hafði rétt fyrir sér og allir hinir höfðu rangt fyrir sér, af því að Guð hafði gefið aðeins einum opinberunina. 

   Varist falsspámenn, því þeir eru sem hungraðir úlfar. Ef þú efast enn, skaltu biðja Guð að fylla þig af sínum Heilaga Anda og leiðbeina þér, af því að það er ekki hægt að afvegaleiða hina útvöldu. Skildir þú það? Það er ekki til sá maður að hann gæti blekkti þig. Páll hefði ekki getað blekkt neinn útvalinn, hefði hann haft rangt fyrir sér. Og á Efesusöldinni var ekki hægt að blekkja hina útvöldu af því að þeir prófuðu falsspámenn og falskennendur og komust að því að þeir voru lygarar og hentu þeim út. Hallelúja! Sauðir Hans heyra raust Hans og þeir fylgja HONUM. Amen. Ég trúi því.
                                 Birna Einarsdóttir þýddi.

 Síðasta viðvörun Andans. 

Opinberunarbókin 3:22: "Hver sem eyra hefur, hann heyri hvað Andinn segir söfnuðunum." Þetta er síðasta viðvörunin. Engin önnur verður gefin. Það er búið að byggja konungssalinn. Það er búið að leggja undirstöðusteinana tólf. Það er búið að leggja hin gulli búnu stræti. Hún stendur eins og pýramídi, fögur og dýrðleg. Hinar himnesku verur, sem hafa búið hana, horfa á hana með öndina í hálsinum, af því að hún glitrar og skín í ójarðneskri dýrð. Öll fegurð hennar segir sögu undranáðar Guðs og kærleika Jesú Krists. Hún er borg búin til fyrir lýð sem er reiðubúinn. Hún bíður aðeins íbúa sinna. Samt er þetta síðasta kallið. Andinn mun ekki tala á annarri öld. Öldunum er lokið. En lof sé Guði, þá er öldunum ekki enn lokið á þessari stundu. Hann er enn að kalla. Og kall hans nær ekki aðeins til andlegra eyrna manna, heldur er enn á ný spámaður í landinu. Enn á ný mun Guð opinbera sannleika, eins og hann gerði í gegnum Pál. 

  Á dögum sjöunda sendiboðans, á dögum Laódíkeualdarinnar, mun Guð opinbera leyndardóma Guðs, á sama hátt og þeir voru opinberaðir Páli. Hann mun tala, og þeir sem taka við þessum spámanni í hans eigin nafni, munu hafa hag af þjónustu hans. Og þeir sem hlýða á hann munu verða blessaðir og verða hluti af brúður þess dags, eins og sagt er í Opinberunarbókinni 22:17: "Og andinn og brúðurin segja: 'Kom þú."' 
   
   Fræið, sem féll í jörðina í Níkeu verður að snúa aftur til hins upprunalega fræs. Lof sé Guði að eilífu. Já, hlustið á hinn staðfesta spámann Guðs, sem birtist á síðustu öldinni. Það sem hann segir frá Guði, mun brúðurin einnig segja. Andinn og spámaðurinn og brúðurin munu segja það sama, og það sem þau segja hefur þegar verið sagt í Orðinu. Þau segja það núna: "Komið út úr henni og aðskiljið yður." Kallið hefur gengið út. Hve lengi mun röddin hrópa? Við vitum það ekki, en við vitum að það mun ekki verða lengi, af því að þetta er síðasta öldin. Hver sem eyru hefur að heyra, hann heyri hvað Andinn segir söfnuðunum. Andinn hefur talað. Sólin er um það bil að setjast og hverfa inn í eilífðina fyrir kirkjualdirnar. Þá verður um seinan að koma. En ef Guð hefur verið að snerta við þér við lestur þessa rits, mættir þú þá iðrast og snúa þér til Hans, til að Andi Hans mætti gefa þér eilíft líf.